Nagsabat ang Beijing nga pahanugutan man sini ang Pilipinas nga magdul-ong sang kinahanglanon nga suplay kag mag-evacuate sang personnel sa Ayungin Shoal sa West Philippine Sea sa kondisyon nga mapahibalo lang ini sa China sang mas temprano.
Ginpahayag ini ni Chinese foreign ministry spokesperson Mao Ning sa isa ka briefing matapos ang pagsapubliko sang Philippine Coast Guard (PCG) nga gin-harass kag ginbalabagan sang China Coast Guard (CCG) ang Philippine mission sang nagligad nga bulan kun sa diin sakay ang isa ka soldado nga Pinoy nga nagamasakit kag kinahanglan dal-on sa ospital.
Sa statement naman sang China, wala na ini sang dugang nga paathag nga ginhatag apang ginsiling nga dapat indi ini paghimuon sang Pilipinas nga palusot agud nga makadala sang construction materials sa BRP Sierra Madre sa Ayungin Shoal.
Ang Ayungin Shoal ukon ang Second Thomas Shoal ang nahamtang 120 nautical miles halin sa Palawan kag klaro nga sulod sa exclusive economic zone sang Pilipinas apang gina-claim ini sang China kag ila ginatawag nga Ren’ai Jiao.
Hugot man nga ginabalabagan sang Beijing ang permanente nga pag-akupar sang Pilipinas sa Ayungin Shoal bangud gin-alegar nga may yara na anay sang gentleman’s agreement nga ginsudlan ang duha ka pungsod kun sa diin nakasugtan nga indi pagkay-uhon sang Pilipinas ang BRP Sierra Madre.
Kun balikan, ginsiling ni PCG spokesperson for the West Philippine Sea Commodore Jay Tarriela nga “barbaric and inhumane” ang ginhimo sang China bangud hungod pa sini nga ginbungguan ang navy boat ang simple gid lamang kuntani nga medical evacuation operation.
Apisar sang harassment sang mas daku nga pwersa sang China Coast Cuard, nagbuligay ang Philippine Navy kag ang Philippine Coast Guard kag madinalag-on nga nadala ang soldado nga Pinoy sa ospital sa Palawan kag nadapatan sang nagakaigu nga pagbulong.
