Nagpaandam ang China nga mangatubang ang Pilipinas sang mas daku nga katalagman kasunod sang promisa sang Estados Unidos sang Amerika nga magahatag ini sang $500 million ukon P29.17-billion bilang dugang sa military funding para sa depensa sang pungsod.
Suno kay Chinese foreign ministry spokesman Lin Jian, mabutang lamang sa alang-alang ang regional stability kag mas magasaka ang tension bangud sa gina-obra sang Pilipinas nga pagpangaluyag sa iban nga mga nasyon nga mag-intra sa isyu sa West Philippione Sea.
Paandam pa ni Lin, mahimo pa gani nga mangin paon ang mga tikang sang Pilipinas bangud padayon ini sa pagpangita sang external forces para apinan ang kaugalingon nga seguridad.
“Trying to introduce external forces to protect its own security will only lead to greater insecurity for itself, and it might even become someone else’s pawn,” pahayag ni Lin.
Ang statement sang sini nga Chinese official ang kasunod man sa pag-abot nanday US State Secretary Antony Blinken kag Defense Secretary Lloyd Austin sa Manila kun sa diin naistorya nila ang ila counterparts diri sa Pilipinas.
Nahibaluan nga magluwas sa daku nga kantidad nga ginpasalig para i-augment sa defense capabilities, may ihatag man ang Amerika nga $128 million ukon P7.4 billion agud doblehon ang investments sa military bases nga mahimo ma-access sang tropa sang Estados Unidos.
Base sa mga impormasyon, nagpahayag man ang interes ang Pilipinas nga magbakal sang F-16 jets halin sa Amerika.
