Naga-deploy ang China sang strategic information operations agud mabahin-bahin ang Filipinos sa tunga sang isyu sa West Philippine Sea.
Kabahin ini sang ginpahayag ni National Security Adviser Eduardo Año sa iya speech sa Pag-asa Island, Disyembre 1, kadungan sang inagurasyon sang bag-o gintukod nga building sang Philippine Coast Guard (PCG).
Ginpahayag man sini nga ang pagpang-bully kag pagpang-harass sang China sa West Philippine Sea ang nagpabugtaw sa patriotismo sang mga Pinoy, apang suno sa iya, bangud sa limitado nga impormasyon sang nagliligad nga mga tinuig, madamo man sa mga Filipinos ang nagduda sa reports nga nagapang-harass ang mga Chinese sa mga manugpangisda nga mga Pinoy kag mangin sa government personnel sang Pilipinas nga nagabantay sa amo nga area.
Photo: Mark Demayo
Pahayag ni Año, ini nga taktika sang China ang indi lamang mahimo mabatuan paagi sa pag-deploy sang militar kundi nagakinahanglan gid sang “holistic approach” kag i-involve ang nagkalain-lain nga sektor.
“It is critical for us to convey a powerful and united message that counters their falsehoods and unites our fellow Filipinos in this important issue,” suno sa security adviser.
Antes ini nga speech ni Año, una na nga nakapahayag sanday Defense Secretary Gilbert Teodoro kag Philippine Coast Guard Spokesperson Jay Tarriela nga nagagamit ang Beijing sang information operations agud magpalapta sang sala kag kwestyonable nga mga istorya online kaangot sa West Philippine Sea.
Suno kay Teodoro, ginapahulag sang China ini nga “disinformation and information operators” agud magpabor ang istorya sa ila, samtang suno naman kay Tarriela, ginapatihan nga “state-sponsored” ini nga information campaigns.
