Nagakatunga ang mga Pilipino sa posisyon sa pagdepensa sa West Philippine Sea bangud sang mga propagandista nga ginagamit sang China agud magpalapta sang disinformation ukon mga kabutigan.
Sa interview sang Bombo Radyo kay Dr. Jeffrey Ordaniel, ang President kag Chief Executive Officer sang non-government, nonprofit, kag nonpartisan volunteer-based organization nga WPS ukon We Protect our Seas Inc., iya ginpahayag nga madamo ang mga pseudo-experts sa social media nga amo ang naga-impluwensya sa opinyon sang mga Pinoy.
Ang mga pseudo-expert amo ang mga indibidwal nga nagapakuno-kuno nga eksperto sa international law apang sa pagkamatuod suno kay Ordaniel, wala man sang credible nga background ukon madalom nga ihibalo kun ano gid ang isyu sa teritoryo nga gina-agaw sang China.
Partikular sini nga natuksuan ang pangalan ni Sass Rogando Sasot nga naga-eskwela sang PhD sa International Relations sa Beijing, China.
Bangud mabudlay nga balion ang claim sang Pilipinas sa West Philipine Sea kasunod sang 2016 Arbitral Ruling, diri na suno kay Ordaniel kag gina-atake na sang mga propagandista ang mga tawo mismo.
Gina-atake man gani sang mga propagandista pati si Retired Supreme Court Senior Associate Justice Antonio Carpio nga amo ang leading expert sa international law kag isa ka central figure sa pagdepensa sa sovereign rights sang Pilipinas sa West Philippine Sea.
“It’s easier for them [propagandista] to destroy the person rather than the message, because the message is very strong. The message is based on the United Nations Convention on the Law of the Sea (UNCLOS),” suno kay Ordaniel.
Sa tunga sini nga disinformation campaign, importante gid suno kay Ordaniel nga mabatuan ini sang Pilipinas paagi sa mga eskwelahan kag pagpadayon sang transparency initiative sang gobyerno ukon ang pagbulgar sang mga pagka-agresibo sang China.#
(AFP/Ted Aljibe/Photo)
