Nasamaran ang isa ka personnel sang Department of Agriculture-Bureau of Fisheries and Aquatic Resources (DA-BFAR) matapos nagpangbomba na naman ang China Coast Guard (CCG) sang water cannon batok sa barko sang Pilipinas.
Natabo ang insidente 9:00 kaina sang aga sa Scarborough Shoal ukon kilala man nga Bajo de Masinloc.
Suno kay Philippine Coast Guard (PCG) spokesperson for the West Philippine Sea Commodore Jay Tarriela, nahalitan man ang BRP Datu Gumbay Piang (MMOV 3014) sang gin-igo ini sang water cannon sang CCG vessel 5301 ang starboard side sini.
Pahayag sang opisyal, naglawig sang 29 minutos ang agresibo nga akto sang China rason nga nagkalabuka ang glass sa aft window sang bridge sang Philippine vessel, na-damage ang cabin partitions sang kapitan, kag may natabo nga short circuit nga nag-apekto sa electrical outlets kag lima ka outdoor air conditioning units.
“One personnel from DA-BFAR sustained injuries due to the shattered glass caused by the water cannon,” suno kay Tarriela.
Ang isa pa ka barko sang China nga may bow number nga 21562 ang nag-atake man sa Datu Gumbay Piang sa pihak nga direksyon paagi man sa paggamit sang water cannon.
Pahayag pa sang PCG, nagpadayon ang pagpang-harass sang China tubtub nga nakalab-ot na ang BFAR vessel sa mas safe nga posisyon.
“Utilizing the seamanship skills of its crew, the BRP Datu Gumbay Piang successfully maneuvered away from the CCG vessels and rejoined nine other DA-BFAR vessels in the area, continuing its mission to provide fuel and supplies to Filipino fishermen,” suno pa kay Tarriela.
Ila man gin-post ang videos kun sa diin gindayon sa gihapon ang paghatag sang bulig sa mga Pilipino nga manugpangisda nga yara sa area.
Nahibaluan nga ang Datu Gumbay Piang ang kabahin sang Kadiwa para sa Bagong Bayaning Mangingisda” mission kaina sang aga.
Ang Bajo de Masinloc kun sa diin natabo ang insidente ang parte sang exclusive economic zone (EEZ) sang Pilipinas apang nalakip sa gina-claim sang China. Nagguwa na sa nauna nga reports nga may plano ang Beijing nga magtukod sang “nature reserve” sa amo nga shoal.#
