ILOILO CITY – Naglunsyar sang “multiple” ballistic missiles sa mga dagat nga nagapalibot sa Taiwan ang China kadungan sang ila ginpatigayon nga military drills.
Ini ang mabaskog nga ginkondenar sang defense ministry sang pungsod nga nagtawag diri nga isa ka irrational action nga nagaguba sang regional peace.
Sa statement sang Ministry of National Defense, naglunsyar sang madamo nga Dongfeng series ballistic missiles ang China sa northeastern kag southwestern sang Taiwan kahapon sang hapon.
Wala gin-detalye sang Taiwan military ang eksakto nga lugar kun sa diin nagtupa ang missile.
Ang ini nga pahayag ang ginkumpirma man sang People’s Liberation Army sang China.
Suno kay Senior Colonel Shi Yi, spokesman sang Eastern Theater Command, ang Chinese forces ang naglunsyar sang multi-regional kag multi-model conventional missile firepower assault sa kadagatan sang eastern part sang Taiwan Island.
Ang tanan nga missile ang nag-igo sa target suno kay Colonel Shi.
