Ginpanginwala sang China nga may ginabayaran ini nga mga online trolls sa Pilipinas agud masulong ang destabilisasyon sa pungsod.
“Sala” kag “wala sang basehan” ini nga pahayag suno sa Chinese Embassy in Manila.
Pahayag pa sang embahada, dapat nga mag-untat na ang mga pulitiko sa pungsod sa pagpa-ibwal sang maritime tension sa tunga sang duha ka mga nasyon.
“Such irresponsible remarks heightened tensions over the South China Sea, poisoned the atmosphere of China-Philippines relations and undermined the diplomatic efforts to manage our differences through dialogue and consultation,” kabahin sang statement sang embahada.
Pahayag pa sini, may prinsipyo ang Beijing nga wala nagapahilabot sa internal affairs sang iban nga mga pungsod. Sa isyu naman sa West Philippine Sea, nagapabilin nga “committed” ang China nga ma-manage ang indi paghangpanay paagi sa dayalogo kag konsultasyon.
“China has always advocated and remains committed to properly managing maritime differences through dialogue and consultation. China will keep the door of dialogue and contact open,” kabahin pa sang statement.
Kun matandaan, si Senator JV Ejercito ang nagpahayag sang nagligad lamang nga Martes nga nangin biktima siya sang pagpang-atake sang trolls sa social media bangud sa iya panindugan sa mga pagpang-harass sang China sa West Philippine Sea.
Ini nga “destabilization efforts” online suno sa senador ang una naman nga nag-target kanday House Speaker Martin Romualdez, Philippine Coast Guard Commodore Jay Tarriela, Defense Secretary Gilberto Teodoro Jr., kag Senate President Migz Zubiri.
Nagapati ang senador nga posible nga kabahin ini sang “destabilization plan” bangud may intelligence reports suno sa iya nga gin-tap ini sang China.
Matandaan nga ang katapusan nga pormal nga dayalogo sa tunga sang Manila kag Beijing kaangot sa gina-agawan nga teritoryo ang natabo sang nagduso ang pungsod sang demarche kasunod sang water cannon incidents sang Disyembre 9 kag 10 sa Bajo de Masinloc kag Ayungin Shoal.
Sini lamang nga 2023, lab-ot sa 65 ka diplomatic protest ang na-file sang Pilipinas bangud sang Chinese activities sa West Philippine Sea.# [Photo by Soumil Kumar from Pexels]
