Ginpasalig sang Chinese authorities nga masunod ang kinamatarong sang tatlo ka mga Pilipino nga naka-detain subong sa China bangud sa alegasyon sang pagpang-espiya.
Suno ini kay Chinese Ambassador to the Philippines Huang Xilian kasunod sang panawagan sang Department of Foreign Affairs (DFA) nga dapat ipaagi ang tatlo sa due process kag dapat nga may respeto sa ila nga mga interes nga sunod sa domestic law kag sa Philippines-China Consular Agreement.
Ginpahayag man ni Huang nga nag-request ang consular office kun mahimo bala makabisita ang pamilya sang tatlo samtang yara sila sa detention facility, apang wala pa sang maathag nga sabat kun naka-desisyon na ang China pabor sa hingyo sang Pilipinas.
Nakahunong ang tatlo sa pasilidad sa Guangzhou matapos gindakop kag gin-akusaran nga kabahin sang gina-alegar nga espionage activities sang Pilipinas batok sa Chinese government.
Sang nagligad nga semana, ginsiling sang Office of Migration Affairs sang DFA nga naka-preparar na ini sang abogado para sa tatlo ka mga Pinoy nga lunsay residente sang Palawan.
