Gin-report sang Philippine Coast Guard (PCG) nga nagpatigayon ang People’s Liberation Army Navy (PLAN) sang China sang military exercises sa Escoda (Sabina) Shoal sa West Philippine Sea (WPS).
Suno kay PCG spokesperson for WPS Commodore Jay Tarriela, natabo ini kadungan sang marine scientific survey sang Pilipinas sa amo nga area sang kadagatan sang nagligad nga Hunyo 3-4.
Pahayag ni Tarriela, antes nagpahibalo ang China sa BRP Teresa Magbanua nga magapatigayon sila sang amphibious drill ukon operation, nakalunsar na sila nga daan sang ila nga hovercraft.
Sa sini nga drill, nakit-an ang masunod nga barko sang China sa shoal: anum ka PLAN vessels, apat ka China Coast Guard ships, isa ka Chinese research vessel, kag siyam ka Chinese maritime militia vessels.
Ang Sabina Shoal amo ang makabig nga rendezvous point para sa mga sakayan nga nagahimo sang resupply missions sa mga soldado nga Pinoy nga naka-estasyon sa BRP Sierra Madre sa Ayungin Shoal.
Sa separado nga report, ginsiling sang scientists sang University of the Philippines (UP) nga ang corals sa Escoda Shoal ang halos 100% na nga patay. Na-obserbaran man ang extensive coral bleaching sa area kadungan sang ginhimo nga marine scientific survey.
