Gindugangan pa sang China ang trade suspensions sa Taiwan kasunod sang pagbisita ni US House Speaker Nancy Pelosi sa amo nga self-ruled island.
Epektibo kahapon, Myerkules nga adlaw, suspendido naman ang natural sand exports sa Taiwan matapos ang mandu sang Ministry of Commerce .
Ginsuspinde man sang General Administration of Customs ang imports sang citrus fruits, chilled white scallops, kag frozen mackerel halin sa Taiwan.
Ginhimo nga rason ang pagka-detect sang pila ka peste sa fruit shipments kag positive coronavirus tests sa cold supply chain.
Antes sini nga tikang, gin-ban na nga daan sang China ang imports sang Taiwanese confectionery, biscuits, tinapay, kag aquatic products.
Nahibaluan nga ang China amo ang largest trading partner sang Taiwan.
Sang nagligad lang nga tuig, yara sa $273 billion ukon P15.21 trillion ang bilateral trade nga katumbas sang 33% sang total trade sang Taiwan sa nabilin nga bahin sang kalibutan.
Sa subong, ginakalabalak-an man sang mga eksperto ang posible mangin impact sini nga tensyon sa semiconductor industry sang Taiwan.
Ini bangud ang Taiwan amo ang ginakabig global leader sa supply sang semiconductor chips nga amo ang importante nga component para sa modern electronics — halin sa mga salakyan, padulong sa refrigerators, padulong sa mobile phones. ##
