Ginpanginwala sang Chinese Embassy sa Manila ang alegasyon nga nagpadala sang pondo ang China sa isa ka politikal nga grupo sa Pilipinas.
Gintawag sang embahada nga “false narrative” ukon indi matuod ang amo nga alegasyon.
Suno kay Chinese Embassy spokesperson Ji Lingpeng, may pila ka politiko sa Pilipinas nga naghimo kag nagpalapta sang amo nga alegasyon, apang wala sini ginhingadlan kun sin-o ang iya ginatumod.
“The Chinese Embassy in the Philippines has noted that recently certain Philippine politicians fabricated and spread a false narrative alleging that China had funneled funds to a particular political faction in the Philippines,” suno sa statement.
Ginpahayag man ni Ji nga gina-angot sang malisyoso ang opisyal nga website sang embahada bilang redirect destination agud suportahan ang amo nga mga alegasyon.
Ginpanawagan man niya sa mga politiko sa Pilipinas nga untatan ang ginatawag niya nga “political manipulation”.
Dugang niya, indi dapat pagdalahigon ang relasyon sang Manila kag Beijing sa lokal nga politika sa Pilipinas.
“We urge the relevant individuals in the Philippines to stop political manipulation and not to drag Philippine domestic politics into China-Philippines relations,” pahayag pa ni Ji.
Suno pa sa Chinese official, ang mga tikang nga nagatinguha nga makakuha sang personal nga politikal nga bentaha paagi sa pagtum-ok sa China mahimo nga makahalit sa interes sang Pilipinas kag sang mga Pilipino.
Ginpahayag man niya nga magahimo sang tikang ang Chinese Embassy agud maprotektahan ang ila ginakabig nga legal nga interes kag dignidad.
“Attempts to achieve personal political gains by smearing and discrediting China and harming China’s interests and image are doomed to fail, and will ultimately undermine the interests of the Philippines and its people.”
Ini nga pahayag sang embahada ang ginpaguwa pila ka adlaw matapos magpagwa ang press conference ni former Senator Antonio Trillanes IV.
Suno kay Trillanes, masobra P319-million nga pondo halin sa mga source nga may kaangtanan sa China ang nagsulod sa Cale88 Foods Corporation nga naangot sa bana ni Vice President Sara Duterte nga si Atty. Manases Carpio.
Ginpahayag man ni Trillanes nga P150-million halin sa Chinese Embassy ang ginhatag sa Tapang at Malasakit Alliance for the Philippines nga naangot naman sa vice president.
Samtang, may ginpresentar nga financial records sa Senate impeachment court nga nagpakita sang masobra P319-million nga inward remittances sa Cale88.
Suno kay Anti-Money Laundering Council Executive Director Ronel Buenaventura, ang kabug-usan nga kantidad naglab-ot sa P319.32-million, kun sa diin 315.94-million sa sini ang halin sa mainland China. Apang, wala nagapakita sa AMLC records nga ang amo nga kwarta mismo halin sa Chinese government.
