Magapatigayon sang joint military drills ang Iran, Russia, kag China subong nga semana.
Maga-umpisa ang drills sa port of Chabahar nga nahamtang sa southeast Iran sa Gulf of Oman, apang indi pa klaro sa nagaguwa nga mga impormasyon kun ano kalawig ang exercises.
Ginapahayag nga maga-upod ang warships kag combat kag support vessels sang Chinese kag Russian naval forces, amo man ang warships sang naval forces sang Iran kag ang Revolutionary Guards nga amo ang ideological arm sang militar.
Suno sa Iranian media, tuyo sini nga mapabakod pa ang seguridad sa rehiyon kag mapasangkad ang multilateral cooperation sa tunga sang tatlo ka nasambit nga mga nasyon.
Ginkumpirma nga magatambong sa drills ang Azerbaijan, South Africa, Oman, Kazakhstan, Pakistan, Qatar, Iraq, the United Arab Emirates, kag Sri Lanka bilang observers.
Sa separado nga statement sang Chinese defense ministry, ginkumpirma nga ipadala sang Beijing ang ila nga destroyer kag supply ship.
Nahibaluan nga nagpatigayon man ang Iranian army sang drills sa amo man nga area sang Pebrero para nga mapabaskog pa ang ikasarang sa depensa batok sa anuman nga pagpamahog sa ila nga pungsod.
