Ginpatawag ni Department of Foreign Affairs Secretary Ma. Theresa P. Lazaro ang Chinese ambassador nga si Jing Quan may kaangtanan sa nangin pahayag sini nga wala sang ikasarang ang Pilipinas sa pwersa sang China.
Kasunod ini sang nagapadayun nga diskusyon sa tunga sang duha ka pungsod kaangot sa West Philippine Sea.
Suno sa DFA, makabig nga serious concern ang nangin statement ni Quan.
Nanindugan man ang ahensya nga indi nila pagpahanugutan ang bisan sin-o nga foreign envoy nga mang-intimidate sa mga opisyal sang Pilipinas.
Dugang pa diri, bukas ang DFA nga makipagdayalogo sa China agud mangin maayo ang relasyon sang duha ka pungsod, samtang padayun nga magapanindugan sa importante nga mga isyu.
Madumduman nga bukas man si Jing Quan nga makipag-isturya kay President Ferdinand Marcos Jr., matapos nagpahayag ang presidente nga luyag niya makipagdiskusyon sa Chinese ambassador bangud sa kontrobersyal sini nga nangin pahayag.
Text by: Bombo Paula Yvonne Alavarta
