Makatulublag ang natabo sa isa ka hotpot restaurant sa Makati City sang gintiro-patay sang isa ka Chinese national ang kaangay man sini nga Chinese samtang sila ang nagaatubangay kag naga-istorya.
Yara sila sa isa ka private room lakip na ang 29-anyos nga biktima.
Nakita gid sa closed circuit television nga nagtindog ang lalaki nga naka-itom kag daw sa wala lang nga gintiro ang iya kaupod sang apat ka beses nga nag-igu sa iya kamot, butkon, kag dughan.
Sang nagtindog na ang isa ka babaye kag naghibi, didto na kag may ginhambal ang suspek sa isa pa nila ka kaupod nga lalaki nga wala man lang naghulag-hulag sa iya pwesto.
Nakit-an sang mga pulis sa lugar ang walo ka bullet casings, duha ka metal jackets, kag lima ka bala.
Suno sa Makati City law enforcement, ginalantaw nga problema sa negosyo ang ginabaisan sang duha antes natabo ang insidente.
Ginalagas na subong ang suspek nga nalagyo matapos ang insidente. Nagapakig-angot man ang pulis sa Land Transportation Office agud ma-trace ang tag-iya sang salakyan nga ginsakyan sang suspek.
Sang nagligad nga adlaw, matandaan nga pilason man ang isa ka Chinese national matapos nga gintiro sang kapareho man niya nga mga Chinese nga nagpakuno-kuno pa nga magabakal sang iya malahalon nga salakyan sa Cabuyao, Laguna.
Nagaduda ang Presidential Anti-Organized Crime Commission (PAOCC) sa intensyon sang mga suspetsado.
Suno kay PAOCC Undersecretary Gilbert Cruz, kinahanglan nga padalman pa ang imbestigasyon bangud may mga insidente man sila nga na-encounter sang una nga ang mga ginapatay, ginatiro, ukon gina-kidnap amo ang ginadudahan nga nagadagdag sa mga suspek sa raid ukon sa dakpanay sa POGO hub.#
