Nanindugan ang Chinese Coast Guard (CCG) nga ginlapas sang barko sang Pilipinas ang ‘International Regulations for Preventing Collissions at Sea’ kag hungod nga nagpalapit sa barko sang China rason nga natabo ang pagbunggu-anay sang barko sa katubigan sang Second Thomas Shoal (Ayungin Shoal).
Suno sa CCG, natabo ang insidente las 5:59 kaina sang kaagahon.
Paathag sang China, illegal nga nagsulod sa ila teritoryo ang Philippine supply ship kag nagpalapit sa Chinese ship.
Makapila ka beses suno sa CCG nga wala ginsapak sang barko sang Pilipinas ang ila paandam.
Gintawag naman sang CCG nga unprofessional ang ginhimo sang barko sang Pilipinas.
Nahibaluan nga sa subong sang pila ka bulan, nagatudlu-anay ang China kag Pilipinas nga amo ang utok sang delikado nga pagmaniobra kag bunggu-anay sa Ayungin Shoal – isa ka ring-shaped island nga sakop sang exclusive economic zone sang Pilipinas.
Pila ka insidente naman ang natabo sang nag-deploy ang Pilipinas sang resupply missions para sa mga soldado nga Pilipino nga nagabantay sa BRP Siera Madre, isa ka daan nga warship nga naka-angkla sa lugar agud ipakigbato ang maritime claims sang pungsod.
Wala naman nakapagwa sang pahayag ang Armed Forces of the Philippines (AFP) kag ang Philippine Coast Guard (PCG) kaangot sa natabo.
