Nagpagwa sang pahayag ang Chinese Embassy nga yara sa Manila agud magdepensa sa ginhimo nga aksyon sang China Coast Guard (CCG) sa barko sang Pilipinas sa palibot sang West Philippine Sea, kun sa diin ginbombahan ini sang water cannon.
Suno sa embahada, naglapas kuno ang mga barko sang Pilipinas sa “adjacent waters” nga sakop sang ginakabig nga teritoryo sang China sa palibot sang ila bahura, nga wala sang otorisasyon.
Bangud sini, nagpatuman ang China sang angay nga “law enforcement measures” bilang sabat sa insidente.
Ginpakalain man sang embahada ang mga komento kag pagkondena halin sa iban nga mga nasyon.
Gintawag sini ang mga embahada sang iban nga pungsod nga dapat mag-verify anay sang kamatuoran antes magpagwa sang reaksyon sa social media.
Apang base sa mga pahayag sang mga Ambassador halin sa nagkalain-lain nga nasyon nga naka-base sa Manila, ila ginbasehan ang United Nations Convention on the Law of the Sea (UNCLOS) kag ang 2016 arbitral ruling nga nagpadula sang bisa sa malapad nga pag-angkon sang China sa West Philippine Sea.
Sa pihak nga bahin, suno sa National Maritime Council (NMC), ginaplano na sang gobyerno sang Pilipinas ang pagpahamtang sang diplomatic actions kag pagpatigayon sang multilateral cooperation kag maritime-capacity building.
Ini nga mga tikang ginahimo agud masiguro ang kaluwasan kag kaepektibo sang mga operasyon sa kadagatan sang Pilipinas.
