May kakilala ka bala nga nanamian gid nga magtinir sa ospital adlaw man ukon gab-i?
Wala gid, indi bala? Kadam-an sang aton kakilala ang indi gid makahulat nga ma-discharge sa ospital.
Apang indi amo sina pirme ang sitwasyon.
Didto sa Beijing, China, isa ka lalaki kag pamilya niya ang nakabiya gid man sa ospital sang damlag lang matapos ang 6 ka tuig nga pagtinir sa sulod sang amo nga medical institution.
Natingala kamo kun paano ina natabo?
Sang 2014, gin-admit ang isa ka lalaki sa amo nga ospital bangud sa duha ka bulan na niya nga pagsuka kag pagkudog sang iya nga tiil sa masobra na sa isa ka semana.
Samtang nagapaidalom sa treatment, gin-updan sang iya mga ginikanan ang amo nga lalaki.
Sang nag-ayo na ang pasyente, nahibaluan nila nga daku ang ila nga medical bill ukon balayran bangud sang ila nga pagtinir sa ospital gani ang iya nga ginhimo…. gin-akusaran niya ang ospital sang indi husto ukon inappropriate treatment sa iya.
Nagpabilin sila sa amo nga kwarto sa ospital kag ginpangdala didto ang ila mga kalaha, bayo, kag iban pa nga kagamitan.
Pila ka beses sila nga gintuyo pahalinon, ginpasakaan sang kaso, kag ginpabayad sang ila nga medical costs apang nagabato man ang lalaki kag naga-countersue sa hospital kag nagaalegar sang medical negligence.
Sang damlag lang, nagdagdag na sang desisyon ang Beijing Xicheng District People’s Court nga dapat na maghalin sa hospital ward ang magpamilya apang entitled sila sa kompensasyon nga halin sa hospital management.
Ang natabo?
Syempre, ginbaton sang pamilya ang 480,000 yuan nga compensation halin sa ospital kag gindul-ong pa sila sang ambulansya papauli sa ila matuod nga balay.
