Naalarma ang South Korea matapos nagsulod sa air defense zone sini ang lima ka Chinese military planes kag anum nga halin naman sa Russia.
Suno sa Joint Chiefs of Staff sang Seoul, 9:35 sang aga sang nagsulod kag nagguwa man dayon ini nga mga military aircraft sa Korea Air Defense Identification Zone sa East Sea kag South Sea.
Ang air defense identification zone amo ang mas malapad nga area ipaanggid sa airspace sang pungsod kun sa diin kontrolado ang aircraft para sa security reasons, apang ini nga concept ang wala na-define sa international treaty.
Gintawag naman sang Chinese defense ministry nga ika-siyam nga strategic patrol ang ila nga pagpalupad sang aircraft sa ibabaw sang Sea of Japan ukon kilala man nga East Sea sa South Korea. Suno sa Beijing, ginhimo nila ini sandig sa annual cooperation plan sa tunga sang Chinese kag Russian militaries.
Gin-report naman sang South Korean military officials nga ang Chinese military aircraft ang naglupad pakadto sa Dokdo islands sa eastern coast matapos naglabay sa Korean peninsula kag Japan malapit sa contested submerged rock nga Ieodo.
Naglupad naman ang Russian planes pa-nabagatnan sa Dokdo islets nga kilala nga Takeshima sa Japanese.
Suno sa officials, nakita pa nga nag-updanay ang Chinese kag Russian aircraft sa dagat sa nabagatnan sang Dokdo antes sila nagseparar kag nagpauli na.
Halin sang 2019, nagapalupad na ang Beijing kag Moscow sang military aircraft sa South Korea air defense zone nga wala sang prior notice kag nagarason lang nga nagahimo sila sang joint exercises.
Natabo man ini sang Hunyo kag Disyembre 2023 kag sang Mayo kag Nobyembre 2022 nga gintawag sang duha ka mga magkaalyado nga pungsod nga “joint strategic air patrols.”
