Ginkumpirma sang Presidential Anti-Organized Crime Commission (PAOCC) nga “authentic” ang Chinese military uniforms nga nakit-an sang gin-raid sang otoridad ang Philippine Offshore Gaming Operator (POGO) compound sa Porac, Pampanga sang nagligad nga semana.
Apang suno sa spokesperson sang talatapan nga si Winston John Casio, sandig man sa ila pagpakig-istorya sa military experts sa intelligence community, daan na ini nga mga uniporme.
Duha ka posibilidad ang ginalantaw suno sa iya nga amo ang: una, posible nga may beterano nga Chinese military personnel nga naga-trabaho ukon nagapanag-iya sa POGO hub, kag ikaduha, ang ini nga mga uniporme ang kabahin sang militaria collection.
Suno kay Casio, tubtub nga wala pa sila sang mabaskog nga ebidensya ginagamit matuod ang pasilidad sang Pogo hub para mag-espiya sa Pilipinas, patihan anay sa subong nga ini nga mga uniporme ang kabahin lamang sang collector items.
Matandaan nga isa sa nakit-an nga uniporme ang may butones nga may nakabutang nga initials nga P.L.A. nga ginasuspetsahan nga nagakahulugan nga People’s Liberation Army (PLA) nga amo ang armado nga organisasyon sang Chinese Communist Party kag amo man ang principal military force sang People’s Republic of China.
Kasunod sini, ginpahayag naman ni anay PNP chief kag anay senador Panfilo Lacson nga sang 2020 pa lamang, nakabaton na siya sang intelligence report nga nakit-an nga may presensya sang gina-alegar nga sleeper cells sang PLA sang China diri sa Pilipinas.
Ang sleeper cell amo ang grupo sang mga operatiba ukon espiya nga sikreto nga nagapuyo sa ila gina-target nga komunidad kag nagahulat lamang sang instruction kun san-o sila mahulag.
Maka-alarma ini suno kay Lacson ilabi na kun basehan suno sa iya ang tyempo-Hapon kun sa diin base sa istorya, antes nagsulod ang mga Hapones, may nagapakuno-kuno nga sari-sari store owner nga Hapon apang sang ulihi, nagguwa nga isa gali ka colonel.
Una naman nga ginpahayag ni Armed Forces of the Philippines (AFP) spokesperson Colonel Francel Padilla nga posible man nga ini nga mga uniporme ang ginagamit lamang nga props sa iligal nga online transactions.
Matandaan nga magluwas sa uniporme kag military boots, may nakit-an man sa Pogo hub nga “outstanding badge” nga iya man sang Chinese military sergeant.#
