ILOILO CITY – Nakagwa sa presuhan kag wala pa sa gihapon napasakaan sang kaso ang duha ka mga arestado lakip na ang isa ka Chinese national nga nakuhaan sang P5 million nga balor sang smuggled nga sigarilyo sa separado nga raids sa Barangay Obrero, Lapuz kag Barangay Lopez Jaena Sur, La Paz, Iloilo City sang Myerkules, Hulyo 24.
Una nga naaresto pinaagi sa gahom sang search warrant si Donnel Jeruta, 31, sa iya balay sa Bo. Obero and sa diin nakuhaan ini sang pila ka mga boxes sang peke nga mga sigarilyo kag lima ka lima ka iligal nga mga armas.
Sang gin-usisa sang mga otoridad, gintudlo naman sini ang Chinese national nga si James Chiu Chen sang Barangay Lopez Jaena Sur, La Paz nga amo ang ginakuhaan sini sang peke nga mga sigarilyo.
Sang gin-raid ang balay sang Chinese national, nakuhaan ini sang ginabanta P4.8 million nga balor sang smuggled cigarettes kag airsoft gun.
Ginbulgar naman ni Chen nga naghalin pa sa pungsod Malaysia ang mga smuggled cigarettes kag ginpadala lang sa iya abyan nga Muslim halin sa Manila.
Ginabaligya naman sini sa Iloilo City ang sigarilyo kag gin-ako nga wala ini sang business permit.
Sa interview sang Bombo Radyo kay Police Lieutenant Wilfredo Hofileña, chief sang 4th Special Operations Unit sang Philippine National Police Maritime Group, iya ginpahayag nga magapangatubang sanday Jeruta kag Chen sang kaso nga paglapas sa Republic Act 8293 ukon Intellectual Property Code of the Philippines.
Una diri, napasakaan na si Jeruta sang kaso nga paglapas sa Republic Act 10591 ukon Comprehensive Firearms and Ammunition Regulation Act.
Paathag ni Hofileña, wala mahingagaw ang pagpasaka sang kaso nga paglapas sa Republic Act 8293 sang tagreklamo nga Japan Tobacco Inc. batok sa mga arestado bangud kinahanglan pa nga kuhaan sang sample sa mga nakumpiska nga sigarilyo kag ipaidalom sa authenticity test agud magserbe nga mapag-on nga ebidensya.
Bangud sini, matuon na lang ini sa regular case pinaagi sa regular filing procedures.
Samtang sa interview naman sang Bombo Radyo kay Police Colonel Ervin Glenn Provido, chief sang Regional Maritime Unit 6, iya ginpahayag nga ang 4th Maritime Special Operations Unit amo ang magapanguna sa pagpasaka sang kaso batok sa mga arestado.
Gin-athag man sini nga indi nila sakop ang 4th Maritime Special Operations Unit bangud yara sila sa idalom sang Philippine National Police National Headquarters sa diin magluwas sa Western Visayas, mahimo man ang mga ini nga maka-operate sa Regions 7 kag 8.
