Pilason ang isa ka Chinese national matapos nga gintiro sang kapareho man niya nga mga Chinese nga nagpakuno-kuno pa nga magabakal sang iya malahalon nga salakyan sa Cabuyao, Laguna.
May pilas sa paa ang biktima sang nakit-an ini sa Barangay Diezmo sa amo nga syudad.
Suno sa Cabuyao City Police, ang biktima ang halin pa sa Mandaluyong, apang gin-updan sini ang mga suspek sa pag-test-drive bangud nagpakuno-kuno ang mga ini nga baklon ang iya SUV.
Apang pag-abot sa bahin sang Alabang, gindeklarar na ang hold-up kag nag-resulta pa sa shooting incident.
Base sa pag-backtrack sa CCTV, nakit-an nga may isa pa gid ka salakyan nga nagasunod sa SUV sang biktima kag amo ini ang nagpara kag nagtiro.
Ginasuspetsahan sang pulis nga indi tumandok sang amo nga lugar ang mga suspek.
Nagaduda naman ang Presidential Anti-Organized Crime Commission (PAOCC) sa intensyon sang mga suspetsado.
Suno kay PAOCC Undersecretary Gilbert Cruz, kinahanglan nga padalman pa ang imbestigasyon bangud may mga insidente man sila nga na-encounter sang una nga ang mga ginapatay, ginatiro, ukon gina-kidnap amo ang ginadudahan nga nagadagdag sa mga suspek sa raid ukon sa dakpanay sa POGO hub.
Padayon pa ang pag-ayam sa mga suspek samtang nagapaayo naman ang biktima sa ospital matapos ang operasyon.
