Ginsulod sang barko sang Chinese navy ang dagat nga sakop na sang Japan.
Gin-anunsyo ini sang Japanese Defense Ministry halos isa ka semana lang matapos gin-report nga iligal man nga ginsulod sang military aircraft sang Beijing ang airspace sang Tokyo.
Ini na ang ika-10 nga tion halin sang Nobyembre 2021 nga nag-trespass ang Chinese survey ship sa kadagatan sang Japan partikular sa Kagoshima Prefecture.
Nakit-an ang vessel nga nagsulod sa territorial waters sa nakatundan ang Kuchinoerabu Island sang alas sais sang aga kag nagbiya naman sa nabagatnan-nakatundan sang Yakushima Island sang 7:53 a.m..
Agud ma-monitor ang Chinese vessel, nagpadala man ang Japanese Maritime Self-Defense Force sang minesweeper kag patrol aircraft.
Nahibaluan nga ang survey vessels amo ang masami nga ginagamit sa pag-conduct sang research sa underwater topography para sa submarine navigation.
Kun lantawon ang tension sa tunga sang China kag Japan, sini lang nga mga tinuig sang nagsinulod ang Chinese ships sa territorial waters sang Japan sa East China Sea sa palibot sang Japanese-controlled nga Senkaku Islands nga gina-claim man sang Beijing kag ila ginatawag nga Diaoyu.
