Ginkansela na ni Chinese President Xi Jinping ang iya nga state visit sa Japan bangud sa nagapadayon nga pagpamahog sang Coronavirus disease 2019 sa nasambit nga pungsod.
Nakatalana kun tani nga magpadulong si Xi sa Japan sa una nga semana sang Abril.
Suno kay Chief Cabinet Secretary Yoshihide Suga, i-reschedule nalang sa iban nga adlaw ang nasambit nga state visit.
Dugang sang natungdan, nahisugtan na sang duha ka pungsod nga himuon nga prayoridad ang pagkontrol sa paglapta sang balatian.
Kinahanglan man nila magbuligay agud mangin madinalag-on ang pagbisita ni Presidente Xi sa Japan.
Madumduman nga una na nga nadesisyunan sang Chinese government nga kanselahun ang pagpatigayon sang tuigan nga National People’s Congress nga isa sa pinaka importante nga political events sa pungsod bilang kabahin sang ila preventive measures agud malikawan nga malatnan sang nasambit nga virus ang mga magatambong.
