Nagapati ang National Bureau of Investigation (NBI) nga naangot sa daku nga grupo ang isa ka Chinese national nga gin-aresto bangud sa gina-alegar nga nagapang-espiya malapit sa opisina sang Commission on Elections (Comelec) sa Manila.
Ginlaragway sang NBI ang grupo nga “covert and highly compartmentalized espionage network” nga naga-operate diri sa Pilipinas.
“Naniniwala kami na ito ay pinapakilos ng isang malaking grupo. However, this is highly compartmentalized,” suno kay NBI spokesperson Ferdinand Lavin. “As we see it now, medyo hindi magkakakilala. ‘Yung pumalit, ‘yung nakaalis last Saturday, hindi niya kilala by name but the equipment was turned over. And the equipment is in operation until the time na kinuha namin ito.”
Kun matandaan, nakuha sa possession sang suspek ang International Mobile Subscriber Identity (IMSI) catcher nga amo ang nagpasaka sang alarma sa intelligence community.
Base pa sa report sang NBI, ang salakyan nga nagadala sang surveillance equipment ang naglabay man sa pila ka high-security government locations lakip na sa Villamor Air Base, sa U.S. Embassy, sa Supreme Court, sa Department of Justice, sa Bureau of Internal Revenue, kag sa Comelec main office sa Intramuros.
Bisan nga wala sang ebidensya nga may data breach ukon tampering sa Comelec, wala man ginadula sang NBI ang posibilidad nga may pagpanghilabot halin sa luwas sang pungsod ilabi na bangud nagahilapit ang eleksyon.
Suno naman kay Justice Secretary Crispin Remulla, mahimo mangatubang sang wala pyansa nga kaso ang ginaalegar nga Chinese spy kaangot sa paglapas sa immigration laws. Ini nga alleged spy ang napaidalom na sa inquest proceedings sa DOJ bangud sa bayolasyon sa Espionage Act of 1941 amo man sa Republic Act No. 10155 ukon ang Cybercrime Prevention Act of 2012.
