Gin-report sang Chinese state media nga CCTV nga gintayaan sang armas sang personnel nga sakay sa barko sang Pilipinas ang China Coast Guard sang yara sa West Philippine Sea sang nagligad nga bulan.
Base sa report sang CCTV, ginsiling nga duha ka personnel sa grounded Philippine military vessel ang naghimo sini sang nagapatrolya ang China Coast Guard sang Mayo 19 sa Ren’ai Jiao ukon sa Ayungin Shoal ukon Second Thomas Shoal.
Ginpahayag man sang China nga natabo ini nga insidente kadungan ang Philippine mission sa tropa nga naka-estasyon sa BRP Sierra Madre.
Wala pa sang ginpaguwa nga official statement ang Philippine Navy, Coast Guard, kag National Security Council, amo man ang embahada sang Pilipinas sa Beijing kaangot sa report sang China.
Kun matandaan, ang mga barko sang China ang nagabomba sang tubig sa kada nagapatigayon ang Pilipinas sang supply mission sa West Philippine Sea, teritoryo nga sulod sa exclusive economic zone sang Pilipinas.
Ini nga parte sang kadagatan ang gina-claim man sang China rason sang ila paggamit sang water cannons kag pag-bunggo sa mga vessel sang Philippine Coast Guard.
Sang nagligad nga adlaw, sa atubang sang international community sa Singapore, gindeklarar ni President Ferdinand Marcos, Jr. nga isa na ka “act of war” pananglitan may Pilipino nga mapatay sa West Philippine Sea bangud sa pagpang-atake sang China.
