Gin-report sang Philippine Coast Guard (PCG) nga nagnubo ang numero sang Chinese maritime militia vessels sa West Philippine Sea bangud sa malain nga panahon halin pa sa nagligad nga mga inadlaw.
Suno kay PCG spokesperson for WPS Commodore Jay Tarriela, wala na nagatumpok ang mga barko sang China sa Rozul Reef amo man sa Hasa-Hasa Shoal.
Indi lang matumod sang opisyal kun ano kadaku ang gin-nubo sa numero sang mga barko, apang ginlaragway ini nga ‘significant decrease’.
Kun basehan ang Philippine Navy, sang Hunyo, ginpahayag nga 49 vessels halin sa China Coast Guard (CCG) kag People’s Liberation Army Navy (PLAN) ang nakit-an sa amo nga area.
Siyam ka CCG vessels kag 14 PLAN vessels ang nasiplatan sa Bajo de Masinloc; 12 CCG vessels kag duha ka PLAN vessels sa Ayungin Shoal; kag siyam ka CCG vessels kag tatlo ka PLAN Navy vessels naman sa Pagasa Island.
Ang record sang Hunyo amo ang pinakamataas nga numero sang Chinese vessels sa WPS ipaanggid sa 11 sang Enero, siyam sang Pebrero, 35 sang Marso, 31 sang Abril, kag 41 sang Mayo.
