ILOILO CITY – Nangin madu-agon ang pag-umpisa kahapon sang Chinese New Year celebration sa syudad sang Iloilo.
Ang selebrasyon nga may tema nga “Filipino-Chinese Community: Breaking Barriers and Building Bridges towards United Iloilo Community”, ang gin-umpisahan paagi sa Chinese Lantern Parade halin sa Iloilo Provincial Capitol tubtub sa Iznart Street sa City proper area.
Kadungan sang ginpatigayon nga programa, ginpasalamatan ni Dr. Felipe Uygongco, chairman sang Chinese New Year Task Force, ang Iloilo City Government kag ang Ilonggo Community.
Suno kay Dr. Uygongco, nagakadapat nga maghungpong ang mga Ilonggo kag Chinese agud nga mapa-uswag ang syudad sang Iloilo.
Ang alkalde naman ang nagpanguna sa pagpasiga sang Filipino-Chinese Friendship Arch sa Plazoleta Gay kag nagtambong man sa kahiwatan si Miss Earth 2015 Angelia Ong.
Ginsundan ini sang paglunsyar sang night market kag food festival nga nahamtang sa Iznart Street kun sa diin ang programa ang ginpangunahan mismo ni Iloilo City Mayor Jerry Treñas.
Sa Enero 29, may yara sang grand cultural show kag fireworks display sa Filipino-Chinese Friendship Arch.
Sa Pebrero 2, may yara sang Chinese New Year Mass sa Sta. Maria Parish kag pagasundan ini sang mall show sang Hua Siong College of Iloilo.
Nahibalu-an nga ang Chinese New Year celebration ang nag-umpisa sang Enero 27 tubtub Pebrero 2.
