Ginpahanumdom ni Senate President Francis “Chiz” Escudero sa iya mga kaupdanan sa Senado nga indi na mag-amot sang komento kaangot sa ginabati-bati nga impeachment batok kay Vice President Sara Duterte.
Suno kay Escudero, indi na dapat pag-intrahan ang “tsismis” kag ang anuman nga istorya kaangot diri, bangud base sa layi, pananglitan may yara sang impeachment case, magaabot gid ini sa Senado kag indi maayo suno sa iya nga ginapangunanan sang sin-o man nga senador ang amo sini nga istorya antes pa man ini makaabot sa ila lamesa.
“Hindi ako pwedeng magsalita niyan at nais ko rin paalalahanan ang aming mga kasamahan sa Senado na huwag magsalita kaugnay sa anumang kuwento o tsismis sa usaping impeachment,” pahayag ni Escudero. “Dahil ayon sa batas, posibleng makarating ‘yan sa Senado at hindi magandang pinapangunahan ng sinumang miyembro ng Senado ang anumang usapin o impeachment na maaaring makarating sa aming mga lamesa at tanggapan at institusyon.”
Pananglitan madayon ini suno kay Escudero, magapungko sila bilang mga mahistrado gani indi gid maayo kun may pre-judgment sila ukon may desisyon na antes pa man mag-abot sa ila ang kaso.
Pahayag sini, “Kung matuloy ‘yan at kung makarating sa amin, uupo kami bilang mga mahistrado at hindi magandang may masabihang miyembro ng Senado na pre-judged o mayroon nang kapasyahan bago pa man dumating dito ang anumang kaso.”
Matandaan nga mismo si Sara ang nagbulgar nga may mga miyembro sa Kamara nga nagaplano nga mag-file sang impeachment complaint batok sa iya bangud gusto i-project ang Duterte Family nga kurap, mga criminal, kag wala sang pulos nga mga tawo kundi gina-una ang personal nga mga interes.
Ang lower chamber paagi kay House Deputy Majority Leader and ACT-CIS party-list representative Erwin Tulfo ang nagpanginwala kaangot sa sini nga huring-huring.#
