ILOILO CITY – Madugay na nga nagaplano si Dr. Bernard Caspe, pinuno sang Iloilo City Health Office, nga pasakaan sang kaso si Iloilo City Mayor Jerry Treñas kag City Administrator Melchor Tan.
Ini ang kasunod sang iya nga pagpsaka sang kaso nga grave coercion, grave mosconduct kag oppression sa Office of the Ombudsman batok kanday Treñas kag Tan.
Sa interview sang Bombo Radyo kay Caspe, iya ginpahayag nga naapektuhan ang iya trabaho, pamilya kag imahe bilang pinuno sang Iloilo City Health Office bangud sa pagpanghingabot.
Suno kay Caspe, gin-akusaran siya ni Treñas nga nagsuporta sa kandidatura ni anay Iloilo City Mayor Jose Espinosa III.
Sa pagkamatuod suno kay Caspe, ginpanugyanan siya nga maghalin na lang sa pwesto lakip na ang pag-akusar sa iya nga naangot sa imoralidad.
Ginpahayag ni Caspe nga sa masobra sa 20 ka tuig niya nga pagserbe bilang government official, nakabaton siya sang nanari-sari nga pasidungog kag kasubong nga kwestyonable ang mga ginapato-pato sa iya.
Sa pihak sini, luyag naman ipalab-ot ni Caspe kay Treñas nga wala siya nagsuporta sa kandidatura ni Espinosa.
Suno kay Caspe, matinlo ang iya konsensiya kag wala sang kamatuoran nga may yara siya sang gindampigan nga pulitiko.
Kun nakabulig man siya sa Pag-ulikid program ni Espinosa, ini ang may kaangtanan sa iya trabaho bilang City Health Officer.
Ang mga kaupod niya kag ang mga pumuluyo nga nangin benepisyaryo ang makapamatuod suno sa natungdan nga wala siya nagapahilabot sa pulitika.
