ILOILO CITY- Handa ang Commission on Human Rights (CHR) Region 6 nga magbulig sa pamilya ni Karl Daniel Bolante, ang soltero nga nasal-an nga subject sa buybust operation kag napatay sang mga operatiba sang Iloilo City Police Office (ICPO).
Sa interview sang Bombo Radyo kay Atty. Jonnie Dabuco, director sang Commission on Human Rights Region 6, iya ginpahayag nga kon magdangop sa ila ang pamilya sang biktima, magahatag sila sang assistance paagi sa pagpatigayon sang motu proprio investigation.
Inii apisar nga may patigayunon man nga motu proprio investigation ang Regional Internal Affairs Service sang Police Regional Office 6.
Suno kay Dabuco, ang motu proprio investigation sang RIAS-6 ang magasentro sa administratibo nga aspeto samtang ang iya sang CHR ang magatutok sa kriminal nga aspeto sang operasyon sang involved nga mga police personnel.
Ginpahayag naman sang regional director nga makabulig sa imbestigasyon ang mga footages sang Closed Circuit Television (CCTV) apang nagakadapat nga may iban nga mga ebidensya nga sarang magsuporta diri.
