ILOILO CITY–Maga-usisa ang Commission on Human Rights (CHR) sa natabo nga engkwentro sa tunga sang tropa gobyerno kag sang myembro sang Regional Taxation Implementing Group sang Kilusang Rebolusyonaryo-PANAY sa Brgy. Atabay San Jose Antique.
Sa interview sang Bombo Radyo kay Police Regional Office (PRO) 6 Director C/Supt John Bulalacao, ginpahayag sini nga nagpadulong mismo ang CHR sa crime scene.
Magluwas sini, nag-upod man sa pag-usisa ang Human rights group nga KARAPATAN-Panay.
Suno kay Bulalacao, luyag mahibaluan sang CHR kun ano ang matuod nga natabo nga nagresulta sa pagkamatay sang pito ka mga rebelde.
Ini ang kasunod man sang akusasyon sang mga NPA nga massacre ang natabo.
Una na nga ginpanindugan sang mga otoridad nga lehitimo nga operasyon ang ginpatigayon sang pulis kag militar.