ILOILO CITY – Nagakahangawa ang Commission on Human Rights sa pahayag ni Presidente Rodrigo Duterte nga may yara sang kahilwayan si Police Lt. Col. Jovie Espinido nga magpamatay sa Bacolod City.
Sa interview sang Bombo Radyo kay Atty. Jonnie Dabuco, Regional Director sang Commission on Human Rights 6, iya ginpahayag nga may yara sang chilling effect ang pahayag ni Duterte.
Suno kay Dabuco, indi madula nga magkabalaka ang publiko nga mangin madugu-on ang war on drugs campaign sa Bacolod City kaangay sa natabo sa mga nakaligad nga area of assignment ni Espinido.
Sa pihak sini, ginpahayag ni Dabuco nga nagapabilin sa gihapon ang ila pagsalig sa Philippine National Police bilang tagpangapin sang mga nagakinahanglan.
Magluwas diri, nagasalig man ang natungdan nga sundon ni Espinido kun ano ang husto kag kun ano ang nakasaad sa layi.
