Nag-umpisa na ang imbestigasyon sang Commission on Human Rights Region VI sa kaso sang pagkaluthang-patay sa nasal-an subject sa kontrobersyal nga drug buy-bust operation sa Barangay North Baluarte, Molo, Iloilo City.
Ini ang kasunod sang pagpanawagan sang hustisya sang pamilya sang biktima nga si Karl Daniel Bolante, 27, kag residente sang nasambit nga lugar.
Nahibaluan nga ang matuod nga subject sa drug buy bust operation, amo si Dave Mendoza, 23 anyos sang Rizal Pala-Pala 2, Iloilo City Proper.
Sa interview sang Bombo Radyo kay Atty. Jonnie Dabuco, director sang Commission on Human Rights Region VI, iya ginpahayag nga nag-umpisa na ang ila imbestigasyon sa amo nga operasyon sa diin nagapakig-angot man sila sa pamilya Bolante agud mas makatipon sang dugang nga mga impormasyon.
Suno kay Dabuco, ginahulat man nila nga makahatag sang dugang nga panaysayon ang abyan ni Bolante nga amo ang ginakabig witness sa natabo nga buy bust operation.
Sa subong suno sa natungdan, ginatinguhaan nila nga matipon ang pila ka mga dokumento kag ebidensya may kaangtanan sa natabo nga operasyon agud matul-id kun ano ang matuod nga natabo.
