Gin-promote ni President Ferdinand R. Marcos Jr. si Christine Pauline Bergaño-Diciano, ang una nga babayi nga piloto sang Philippine Coast Guard (PCG), sa mas mataas nga ranggo nga Commodore, pagkatapos sang rekomendasyon ni Department of Transportation (DOTr) Secretary Vince Dizon.
Si Commodore Bergaño-Diciano isa ka proud nga miyembro sang Coast Guard Officer’s Course (CGOC) “A” Matatag Class 02-2001 kag kabahin sang pinakauna nga batch sang mga babayi nga opisyal sa maragtas sang PCG.
Nangin una siya nga babayi nga Coast Guard Pilot sang 2005 kag nagsugod sang iya pinakauna nga flight mission sang 2006.
Isa man siya sa mga nanguna sa mga aerial missions nga nagdala sang importante nga medical supplies sa mga malayo nga komunidad sa tunga sang COVID-19 pandemic.
Sa idalum sang West Philippine Sea (WPS) Oplan Matatag sang 2010, siya man ang una kag bugtong nga babayi nga nangin PCG Air Station Commander.
Sang 2022, ginhatagan siya sang responsibilidad bilang Coast Guard Aviation Force (CGAF) Commander.
Bilang lider sang PCG Gender and Development (GAD) unit, ginduso ni Commodore Bergaño-Diciano ang pag-apil sang “hijab” sa uniporme sang mga babayi nga Muslim nga personnel sang Coast Guard, isa ka tikang nga ginpasidunggan sang United Nations Human Rights Council (UNHRC).
Nagpakigbato man siya para sa pagduso sang babayi nga rescue swimmers kag drivers.
Nagserbisyo man siya sa nagkalain-lain nga unit sang Coast Guard, lakip na ang Coast Guard Education, Training and Doctrine Command (CGETDC), Deputy Chief of Coast Guard Staff for Human Resource Management (CG-1), Coast Guard Flag Office, Coast Guard Internal Audit (CGIA), Coast Guard Procurement Service (CGPS), kag Coast Guard Logistics Systems Command (CGLSC).
Sang 2014, nangin una siya nga babayi nga Asian Vice-President sang Women’s Association sang World Maritime University (WMU) sa Malmö, Sweden.
Ginkilala man siya sang PCG sa selebrasyon sang National Women’s Month 2025 paagi sa “Pilak Award”.
