Natigayon nga madakpan sang Criminal Investigation and Detection Group 6 ang gin-alegar nga notorious scammers sa ila ginpatigayon nga entrapment operation kahapon nga adlaw, Hunyo 29.
Base sa imbestigasyon naga-edad sang 30-anyos ang suspek kag nagagamit sang nagkalain-lain nga alyas kaangay sang “Vanessa”, “Diana”, “Samantha” kag may mga kaupod pa ini nga ginapatihan nga kabahin man sang sindikato nga si Alayas Nathan.
Nagapanag-iya ang babayi sang nagkalain-lain nga negosyo kaangay sang construction supplies kag car rental apang nadiskubrehan nga ang kompanya wala nakarehistro sa Securities and Exchange Commission amo man sa Bureau of Internal Revenue.
Suno sa mga awtoridad, online ang kadam-an nga transaksyon sang mga ini.
Ang modus sang mga ini amo ang pagpasalig nga makadeliver sang mga produkto ukon serbisyo, magpangayo sang down payment, kag pagkatapos wala na ginatuman ang kasugtanan.
Masobra sa napulo ka mga biktima halin sa nagkalain-lain nga bahin sang probinsya sang Iloilo ang nagreklamo batok sa mga suspek.
Sa interview sang Bombo Radyo kay Alyas Pido, isa sa mga tagreklamo, iya ginpahayag nga madamo sila ang nabiktima sang amo nga pagpang-scam.
Suno pa sa iya nga ordinaryo lamang ini nga tawo nga nagapangabay nga mapasakaan sang kaso ang suspek bangud ginpangabudlayan man sini ang amo nga kantidad nga ginkuha sa iya.
Sa sepadaro naman nga interview kay Alyas Ram, isa man sa na-scam, iya ginpahayag nga nagbakal ini sang construction supplies sa suspek apang sang nagdugang na ini sang order, wala na ini gin-deliver kag nag-untat na ang ila transaksyon.
Naglab-ot sa masobra P60,000 ang iya kwarta nga gintaban sang suspek.
Suno naman kay Alyas Joey nga isa man sa nabiktima, nagrenta ang suspek sang duha ka pickup sa iya car rental business.
Apang may wala sang pag-intindihanay nga natabo sa ila nga transakyon kun sa diin naglab-ot na sa punto nga ginbuyayaw na ini sang suspek.
Suno pa kay Alays Ram, ginpahog man sini ang iya nga bata kag pamilya.
Nagapangabay man ini sa mga awtoridad nga madakpan ang amo nga suspek agud nga ma-untat na ang mga malain nga ginahimo sini.
Pagapasakaan sang kaso nga Estafa ang suspek sa idalom sang Article 315 sang Revised Penal Code kag bangud man sa paglapas sini sa Republic Act No. 7394 ukon Consumer Act of the Philippines kag Republic Act No. 11976 ukon Ease of Paying Taxes Act.
Suno naman sa mga awtoridad nga wala pa naghatag sang pahayag ang suspek kag ginatugyan na lang sini sa iya nga abogado ang ila masunod nga tikang.
Padayon naman ang imbestigasyon sang kapulisan sa mga posible kaupod pa sini sa gina-alegar nga scam operation.
