ILOILO CITY – Gin-athag sang Criminal Investigation and Detection Group (CIDG) nga indi matuod ang nagalapta nga text message tuhoy sa ginapahayag ‘assasination’ batok sa mag-amay nga sanday Iloilo 1st District Cong. Richard Garin kag Guimbal Mayor Oscar Garin.
Ini matapos ang pagbuyagyag ni Cong. Garin nga may nabaton siya nga impormasyon nga may mandu ang CIDG gikan kay Presidente Rodrigo Duterte nga ipapatay sila nga mag-amay.
Sa exclusive interview sang Bombo Radyo kay CIDG-6 Director Police Colonel Benliner Capili, iya ginpahayag nga indi matuod ang mga nagalapta nga text messages tuhoy sa ginapahayag ‘assasination’ batok sa mag-amay nga Garin.
Sa pagkamatuod suno kay Capili, bisan sin-o ang mahimo nga makapalapta sang sala nga impormasyon paagi sa text messages kag paguwa-on nga naghalin ang mensahe sa CIDG.
Ginpahayag man ni Capili nga wala siya sang ideya kun sa diin naghalin ang nasambit nga impormasyon nga nakalab-ot sa mag-amay nga Garin.
Suno sa CIDG director, mas makapaayo kun sila mismo ang magpangita sang paagi agud nga mahibaluan kun sa diin naghalin ang nasambit nga mensahe.
