ROXAS CITY, CAPIZ – Padayon ang imbestigasyon sang Criminal Investigation and Detection Group agud mahibalu-an kag madakpan kun sin-o ang responsable sa pagpalapta sang sex video scandal sang isa ka Sangguniang Kabataan Chairwoman sa probinsya sang Capiz.
Mismo ang 26 anyos nga SK Chairwoman ang nagdangop sa otoridad agud nga matapna na ang paglapta sang kontrobersyal nga video.
Una diri, may yara sang isa ka account nga nag-post sang lima ka video clips sa isa ka Facebook job hiring page sa Capiz.
Makita sa nasambit nga video ang isa ka babayi nga sang ulihi, nakilala nga isa ka SK Chairwoman samtang lalaki naman ang naga-uyat sang gadget nga amo ang gingamit sa pagkuha sang video.
Ginapahayag nga ang pagpalapta sang sex video scandal ang kasunod sang pagbulagay sang magkahagugma.
