MIAGAO, ILOILO – Ginpasakaan sang Criminal Investigation and Detection Group Region 6 sang sampaw-sampaw nga kaso ang mga opisyales sang Barangay Indag-an, Miagao, Iloilo lakip na ang isa ka social worker bangud sa ginapahayag anomaliya sa tagtaganay sang Social Amelioration Fund.
Sa interview sang Bombo Radyo kay PCol. Gervacio Balmaceda, pinuno sang Criminal Investigation and Detection Group Region 6, iya ginpahayag nga may yara sang reklamo nga ang mga ginpanghatagan sang ayuda halin sa Social Amelioration Program ang indi man kwalipikado nga benepisyaryo.
Suno kay Balmaceda, ang syam ka mga opiyales lakip na si Punong Barangay Wilfredo Fajunio, pito ka mga barangay kagawad sini kag social worker sang Municipal Social Welfare Office ang pasakaan sang kaso sa paglapas sa Republic Act 3019 ukon Anti-Graft and Corrup Practices Act, paglapas sa Republic Act 11469 ukon Bayanihan to Heal as One Act kag Republic Act 6713 ukon Code of Conduct and Ethical Standards for public officials and employees.
Samtang atubangon naman ni Punong Barangay Fajunio ang kaso nga ipasaka sa iya kag sa mga kaupdanana sini.
Suno kay Fajunio, wala sang kamatuoran ang alegasyon sang tagreklamo bangud ginatinguhaan man niya nga malakip ang mga pumuluyo apang ini ang gina-validate sa gihapon sang Department of Social Welfare and Development.
Sa 168 nga household sa Brgy. Indag-an, 50 lang gid ang nakabaton sang Social Amelioration Fund.
