ILOILO CITY – Magaserbe nga tracker team kag lead unit ang Criminal Investigation and Detection Group sa mga preso nga indi magsungka sa sulod sang 15 ka adlaw santo sa mandu ni Presidente Rodrigo Duterte may kangtanan sa kontrobersiya sa Good Conduct Time Allowance.
Sa interview sang Bombo Radyo kay Philippine National Police Chief Police General Oscar Albayalde, iya ginpahayag nga sa pinaka-uli nga data nga iya nakuha, 25 sa 1,914 ka preso nga nakabenepisyo sang Good Conduct Time Allowance ang nagsungka na.
Kalabanan sa mga preso nga nagsungka ang nakahimu sang heinous crime kasubong sang murder kag rape.
Suno kay Albayalde, ang mga nagsungka nga preso ang igakustodiya sang Philippine National Police kag igapaidalom sa medical examination bag-o dal-on sa jail facility nga ila ginhalinan.
Matapos ang 15 ka adlaw nga plaso, ginpahayag ni Albayalde nga ang tracker team ukon ang Oplan Manhunt Charlie na ang magapangita sa mga anay preso nga ginakabig na nga ‘fugitive’.
Ang Criminal Investigation and Detection Group na suno kay Albayalde ang may yara sang daku nga katungdanan sa pagdakop sa mga wala nagsungka nga preso samtang magapakig-angot naman sila sa international police agud nga madakpan ang mga preso nga yara na sa luwas sang pungsod.
Kun binag-binagon suno sa PNP Chief, wala sang sala ang mga preso bangud nga ang Bureau of Corrections ang nagapatigayon sang pagsuma sa ginahatag nga time credits.
Magluwas diri, ipaidalom man sa review suno kay Albayalde ang record sang mga preso nga nagsungka.
Kabahin sang proseso suno sa natungdan amo nga nakadepende ang pinal nga desisyon sa Department of Justice Secretary kun bala nagakadapat nga hatagan sang Good Conduct Time Allowance ang isa ka preso.
Nahibalu-an nga nagpadulong sa syudad sang Iloilo si Albayalde agud magserbe nga dinapit nga bisita sa ika-118 nga police service anniversary.
