Ginhingyo sang Criminal Investigation and Detection Group (CIDG) sa International Criminal Police Organization (Interpol) nga magpagwa sang red notice batuk kay anay Presidential Spokesman Atty. Harry Roque.
Ini ang ginkumpirmar ni CIDG Director Major Gen. Nicholas Torre III.
Una na nga nagpadala sang tracker teams ang CIDG agud arestuhon ang mas o menos 50 ka iban pa nga mga kaupod nga akusado ni Roque, lakip na si Cassandra Li Ong nga gina-imbestigaran bangud sa ginaalegar kahilabtanan nila sa iligal nga operasyon sang Philippine Offshore Gaming Operator (POGO).
Matandaan man nga nagpagwa sang arrest warrant ang Angeles City Regional Trial Court Branch 118 batok kay Roque sang Mayo 15 bangud sa ginapahayag paglapas sa Republic Act 9208 ukon Anti-Trafficking in Persons Act of 2003.
Ang kaso batok kanday Roque, Ong kag 49 ka iban pa ang nag-ugat sa reklamo nga ginpasaka sang Department of Justice sadtong Abril bangud sa ginaalegar kahilabtanan nila sa operasyon sang scam hub Lucky South 99 sa Porac, Pampanga.
Sang nagligad, ginpahayag ni anay tigpamaba sang former President nga pulitika ang inisyatibo sang Department of Justice nga kanselahon ang iya passport.
Ginpanindugan ni Roque nga ang plano sang administrasyon ni Marcos nga kanselahon ang iya pasaporte ang kabahin sang pagtinguha sini nga pahipuson siya bilang vocal critic sang administrasyon kag kaalyado sang mga Dutertes.
Ginpahayag man ni Roque nga temprano pa nga istoryahan ang pagkanselar sang iya passport bangud sang iya pag-file sang motion for reconsideration sang nagligad nga semana nga nagahingyo sa DOJ nga ibasura ang iya kaso.
