Yara na sa phase 2 ang pila ka mga ginatukod nga cisterns sang Iloilo City Government.
Ini ang nagaserbe bilang ‘reservoir’ sang tubig sang syudad kon tag-ilinit.
Sa interview sang Bombo Radyo kay Engr. Niel Ravena, head sang General Services Office (GSO), iya ginpahayag nga ang La Paz cistern ang operational subong, kon sa diin, isa sa ginakuhaan sang talatapan agud nga gamiton sa pagpamunyag sang mga tanom sa syudad.
Nagaserbe man ini nga mitigating measure sa pagbaha-baha nga ma-eksperyensya sang amo nga Distrito.
Suno kay Ravena, ang tanan nga mga merkado sa syudad ang may cistern agud mas mapreparahan ang drought nga dala sang El Niño.
Lakip sa mga padayon nga ginaubra amo ang cistern sa Jaro Plaza, Molo Plaza, kag Arevalo Plaza.
Samtang ang sa Plaza Libertad ang ginalauman nga mangin operational subong nga bulan .
Una na nga ginmando ni Iloilo City Mayor Jerry Treñas nga magtanom sang dugang nga mga puno agud nga mas mapanubo ang temperatura kon summer kag mas mabuhinan ang pagbaha sa syudad.
