𝗜𝗟𝗢𝗜𝗟𝗢 𝗖𝗜𝗧𝗬 — Ginkwestyon sang Citizen Rights Watch Network ang paghatag sang West Visayas State University sang titulo nga Doctor of Laws honoris causa kay First Lady Atty. Liza Araneta-Marcos.
Sa interview sang Bombo Radyo kay Josiah David Quising, co-convenor sang Citizen Rights Watch Network, iya ginpahayag nga may duha siya ka punto kun ngaa indi kwalipikado ang West Visayas State University – College of Law nga hatagan sang amo nga titulo ang first lady.
Una diri, santo sa Section 2(a) kag Section 5 sang Memorandum Order No. 9 Series of 2017 sang Legal Education Board, kinahanglan nga naga-exist ang isa ka Law Institution sang masobra 25 years antes paman nga makahatag sang honorary degree nga honoris causa, apang sa ihibalo sang tanan, Agusto 2020 lang sang nagbukas ang nasambit nga Law school.
Pangaduha, ang wala gin-athag sang Legal Education Board kun full time ukon part time faculty ang makabaton sang amo nga pasidungog. Suno kay Quising, indi pa kwalipikado ang West Visayas State University nga makahatag sang nasambit nga honorary degree kun basehan ang mga guidelines sang kapareho nga mga law schools.
Nagalaum naman si Quising nga maklaro ang mga nasambit nga palamangkutanon agud mag-giyahan ang iban nga law institutions.
Nagpasalig naman ang Legal Education Board sang unibersidad nga makalab-ot sa mga natungdan nga opisina ang mga kwestyon nga gusto masabat kag maklaro ni Quising.
