ILOILO CITY–Nagpalab-ot sang sulat ang mga bag-o nga opisyal sang Brgy. North Avanceña, Molo, Iloilo City sa Iloilo City Council tuhoy sa wala maturn-over nga dokumento kag inventory sang nagligad nga administration.
Sa interview sang Bombo Radyo kay Councilor Joshua Alim, ginpahayag sini nga nakabaton siya sang sulat halin sa Brgy .North Avanceña nga nagareklamo sang pagpaganot sang mga nagligad nga administrasyon sa pag turn-over sang mga dokumento kag mga pagkabutang rason nga naapektuhan man ang ila nga pagtrabaho.
Sunu kay Alim, magluwas sa Brgy. North Avanceña, may yara pa gid sang tatlo ka mga barangay ang may kasubung man nga problema.
Ini ang ginalakipan sang Brgy. San Antonio kag Brgy. Tap-oc sa distrito sang Molo kag Brgy. Hinactacan sa distrito sang Lapaz.
Ginduso naman ni Konsehal Alim sa Committee on Barangay Affairs nga ginapamunuan ni Association of Brgy. Captain President Irene Ong sang President Roxas, City Proper.
Samtang, pulitika ang nakita nga rason ni Alim sa pagpaganot sang mga anay opisyales sang Brgy. North Avancena, Molo, Iloilo City.
Suno kay ginpahayg sang konsehal nga usisaon sang City Council pinaagi sa Committee on Barangay Affairs ang nasambit nga reklamo.
Magapatawag sang isa ka legislative inquiry ang nasambit nga komitiba diin ipatawag ang City Department of Interior and Local government (DILG), City Auditor kag City Treasurer agud mahibalu-an kun ano ang mangin epekto sini sa subung nga administrasyon kag ano ang mangin salabton sang anay administrasyon.
Hibalu-on man ang rason kun ano ang natabo sa mga inventory sang mga pagkabutang sang barangay kag kun yara pa bala ang mga pagkabutang ukon nagkaladula na.