ILOILO CITY- Tun-an liwat sang magapungko nga chairman sang Committee on Transportation sa Iloilo City Council ang tanan nga aspeto sang kontrobersyal nga Local Public Transport Route Plan (LPTRP) kag tanan nga isyu natuhoy sa sektor sang transportasyon sa syudad.
Sa interview sang Bombo Radyo kay Iloilo City Councilor Atty. Sedfrey Cabaluna, iya ginpahayag nga bilang bag-uhanon nga konsehal, himuon niya ang iya papel agud nga mas maplastar sang maayo ang LPTRP nga indi ini mangin dako nga huol sa palaabuton kaangay sa kun ano ini subong.
Suno kay Cabaluna, importante man nga marealisar sang mga opisyal sang syudad nga ini nga bagay ang indi lang dapat himuon nga ‘trial and error’ bangud tuman ka damo nga sektor ang apektado sini.
Pahayag pa niya, nakigsugilanon naman ini sa mga transport groups agud mapamatian ang ila mga concerns, amo man ang ila luyag kag indi luyag matabo.
Apang suno kay Cabaluna, ginapahangop niya sa mga transport group nga may mga butang nga indi na mahimo mapunggan kaangay sang modernization kag ini ang dapat nga atubangon sang tanan.
