City Councilor Javellana, may yara sang proposal may kaangtanan sa mangin penalidad sang mga bulangan nga nagalapas sa protocol sang IATF kag ordinansa sang syudad

Ginaduso ni Iloilo City Councilor Jojo Javellana ang paghatag sang penalidad sa mga nagalapas sa protocol sang Inter-Agency Task Force (IATF) kag mga ordinansa sang syudad may kaangtanan sa pagpatigayon sang bulang.

Sa interview sang Bombo Radyo kay Councilor Javellana, chairman sang Committee on Games and Amusement, iya ginpahayag nga sa nasambit nga proposal, may mga nagakaigo nga penalidad sa mga nagalapas sa pagsulundan.

Ang 1st offense amo ang tatlo ka bulan nga closure sang bulangan, 2nd offense amo ang isa ka tuig nga closure kag ang 3rd offense amo ang pagkansela sang prangkisa.

Suno kay Javellana, mabug-at man ang nasambit nga mga penalidad, apang nagakadapat lang ini agud indi na maliwat pa ang natabo sa Rockwell Cockpit Arena nga ginsuspende sang duha ka semana bangud sa pagpatigayon sang bulang apisar nga temporaryo ini nga gin-untat bangud sa pagtaas sang kaso sang COVID-19 sa pungsod.

Indi pa mapasa sang konsehal ang proposal bangud kinahanglan pa ini nga matun-an kag ipasa sa City Legal Office.

Ginalauman nga sa masunod nga semana, Abril 30, may yara na naman sang patigayunon nga committee hearing tuhoy sa ginaduso sang konsehal.