Nagsuhestiyon si Iloilo City Councilor Sheen Marie Mabilog nga kakson ang tinaga nga “USWAG” sa ginaproponer nga ordinansa ni Iloilo City Councilor Rudolph Jeffrey Ganzon.
Ang nasambit nga ordinansa amo ang USWAG Negosyo Credit Access for Resilient Enterprises (CARE) Program nga iga-institutionalize para sa mga kwalipikado nga nano kag micro enterprises sa siyudad.
Gani, nagatuyo ini nga makahatag sang credit access kag capacity-building support sa existing nano kag micro enterprises.
Apang matapos nga ginpresentar ni Ganzon ang committee report, nag-manifest si Mabilog nga indi dapat maggamit sang tinaga nga “Uswag,” agud malikawan ang pag-angot sang programa sang gobyerno sa sin-o man nga politiko ukon administrasyon.
Suno kay Mabilog, nagabag-o ang administrasyon sa siyudad, gani dapat indi magdepende sa ngalan ukon branding sang isa ka lider ang mga programa nga ginahimo nga permanente paagi sa ordinansa.
Gindugang niya nga dapat talupangdon ang DILG Memorandum Circular No. 2026-006 ukon ang Anti-Epal Policy agud masiguro nga indi magamit ang mga programa sang gobyerno para sa politikal nga pagpabugal ukon pagpromote sang mga opisyal.
Samtang, wala sang konsehal nga nagkontra sa suhestiyon ni Mabilog, pero ginpahayag ni Ganzon nga bukas siya sa pagdeliberar sang gin-raise nga concern.
Madumduman nga kaangay man ang suhestiyon ni Mabilog sang nagduso sang ordinansa si City Councilor Miguel Treñas nga Negosyo Development Academy nga anay Uswag Negosyo Academy.
Text by: Bombo Cyrene A. Nasis
