𝗜𝗟𝗢𝗜𝗟𝗢 𝗖𝗜𝗧𝗬—Ginbutangan na sang bag-o nga mga LED lights sang Iloilo City Engineers Office ang ginareklamo nga madulom nga highway sa Brgy. Mansaya kag Brgy. Loboc sa distrito sang Lapuz, Iloilo, City.
Sa interview sang Bombo Radyo kay Mr. Joel Gerasmia, Electrical Inspector II sang Iloilo City Engineers Office, iya ginpahayag nga may ginbutang na sila nga 40 ka mga LED Lights nga may kapasidad nga 120 watts ang tagsa ka suga agud masigurado nga masanag ang bahin sang nasambit nga mga lugar.
Suno kay Gerasmia, may nahulog nga primary line ukon kabahin sang isa ka poste sa nagatindog nga street lights sa amo nga lugar, rason nga naguba ini, lakip na ang mga suga.
Gin-athag man sini nga lunsay naponder ang tanan nga mga suga sang ila street lights rason man nga nangin tuman ka madulom ang lugar.
Ginpatpat man sang natungdan nga gina-survey man sang talatapan ang mga street lights sa dalan kag wala ginapabay-an.
Nahibaluan nga ginapanag-iyahan sang MORE Power Electric Corporation ang primary line nga nahulog sa mga street lights.
Magakoordinar naman ang talatapan sa MORE Power agud nga mahitso ang sitwasyon sang ila nga poste kag indi na magliwat ang amo nga insidente.
