𝗜𝗟𝗢𝗜𝗟𝗢 𝗖𝗜𝗧𝗬 — Nagpanugyan ang City Engineers Office sa mga opisyal sang tagsa ka barangay sa Iloilo City nga magkoordinar sa ila opisina kun may yara sang proyekto nga drainage.
Sa interview sang Bombo Radyo kay Joel Gerasmia, Chief of Staff sang City Engineers Office, iya ginpahayag nga tuman ka importante ang pagplastar sang drainage sa isa ka lugar bangud ginabasehan ang posisyon kag elevation sini sa duta.
Suno kay Gerasmia, agud nga mangin epektibo ang isa ka drainage, kinahanglan nga may pag-giya ini halin sa eksperto kag ehenyero, isa man ka rason nga ginaduso sang talatapan magkoordinar sa ila.
Ginpahayag man sini nga handa ang ila opisina nga magtudlo sa mga kontraktor nga ginakuha sang barangay agud nga maghimo sang drainage.
Nahibaluan nga masami nga ang mga proyekto nga drainage sang mga kabarangayan ang wala nagaagi sa nasambit nga talatapan, isa man ka rason kun ngaa wala naga-inangot ang drainage sa main-drainage system sang syudad.
