𝗜𝗟𝗢𝗜𝗟𝗢 𝗖𝗜𝗧𝗬 — Nagpatuman ang City Engineers Office sang massive declogging sa mga kabarangayan sa Iloilo City agud nga masolusyunan ang pagbaha ilabi na subong nga tig-ululan.
Sa interview sang Bombo Radyo kay Joel Gerasmia, Chief of Staff sang City Engineers Office, iya ginpahayag nga mayor nga problema sang drainage sa syudad amo ang mga basura nga ginapanghaboy bisan diin lang.
Suno kay Gerasmia, apisar sang kadakuon sang drainage, may yara gid sang basura nga nagapabilin nga nagatuga sang pagbara, sa diin, nagapugong ini sa tubig agud nga maka-ilig.
Ginpahayag man sini nga isa man sa rason sang madasig nga pagtaas sang tubig-baha, amo ang wala nakakonektar nga mga drainage sang kabarangayan sa main drainage sang syudad.
Para sa talatapan, isa ini ka dako nga pagpanghangkat sa ila nga pagpatuman sang declogging operation.
Na-obserbahan man sang natungdan nga halos sa tanan nga mga proyekto nga drainage sang mga barangay, ang wala nakaagi sa City Engineers Office, rason nga nagasalagisag ang alagyan sang tubig.
