Natapos na sang Iloilo City Engineers Office ang pagpangkakas sang mga kable sang telecommunication companies sa Iloilo City Proper.
Sa interview sang Bombo Radyo kay Mr. Joel Gerasmia, Electrical Inspector II sang City Engineers Office, iya ginpahayag nga indi magnubo sa 15 ka mga dump trucks ang nahakot sang talatapan nga mga spaghetti wires sugod sang ginsugoran ang amo nga tikang.
Suno kay Gerasmia, natapos sang nagligad nga semana ang ila pagpangbaklas antes pa man magtakop ang deadline nga ginhatag sa ila ni Iloilo City Mayor Jerry Treñas.
Gin-ako man sang natungdan nga nangin dako nga pagpanghangkat sa ila ang mga poste nga ginasab-itan mismo sang mga kable bangud nagakatumba ini.
Gina-istoryahan naman sang talatapan ang plano sa Diversion Road, Mandurriao agud nga masunod ini sa underground cabling.
